काठमाडौं । राष्ट्रिय स्वतन्त्र पार्टीकी सांसद एवं पूर्वस्वास्थ्य राज्यमन्त्री ले फरक क्षमता भएका व्यक्तिहरुका लागि आवश्यक स्वास्थ्य सामग्री पनि स्वास्थ्य बीमा कार्यक्रममा समेट्नुपर्ने बताउनु भएको छ ।
नेत्रहीन महिला संघ, नेपालले शुक्रवार काठमाडौंमा आयोजना गरेको एक कार्यक्रममा बोल्दै उहाँले सो आवश्यक्ता औंल्याउनुभएको हो । सांसद कार्कीले स्वास्थ्य बीमा कार्यक्रममा फरक क्षमता भएका व्यक्तिहरुका लागि आवश्यक स्वास्थ्य सामग्रीहरु समेटनका लागि नीति निर्माण नै गर्नुपर्ने भएको उल्लेख गर्दै त्यसमा आफूले काम गर्ने प्रतिवद्धता समेत व्यक्त गर्नुभयो । उहाँले निजी क्षेत्रका संघ, संस्थाहरुलाई पनि सामाजिक उत्तरदायित्व अन्तरगत फरक क्षमता व्यक्तिहरुलाई रोजगारी दिने कुरामा विशेष ध्यान दिन आग्रह गर्नुभयो । सांसद कार्कीले संविधानले फरक क्षमता भएका व्यक्तिका लागि विशेष व्यवस्था गर्न भनेपनि त्यस अनुसार निजी क्षेत्रले काम नगरेकोमा असन्तुष्टि समेत व्यक्त गर्नुभयो ।

उहाँले भन्नुभयो, ‘यो कर्पोरेट सोसियल रेस्पोन्सिबिलिटीको दायरामा फरक क्षमता भएकाहरुलाई पनि ल्याउन म भुमिका खेल्नेछु । जतिपनि निजी क्षेत्रका संघ, संस्थाहरु छन् । हस्पिटलहरु, स्कुलहरु, रोजगारीका लागि खोलिएका विभिन्न संस्थाहरु छन् । उहाँहरुले सिएसआरको दायरामा यो फरक क्षमता भएका व्यक्तिका लागि विशेष अवसर, सुविधालाई समेट्नु पर्दछ । उनीहरुलाई प्राथमिकतामा राख्नपर्दछ भनेर मैले जोड दिनेछु । त्यसमा तपाईहरुले पनि हातेमालो गर्नु हुनेछ भन्ने मलाई विश्वास छ । र स्वास्थ्य विमाको कुरा गरिरहँदा स्वास्थ्य विमा पाउनका लागि एकदमै कठिनाई भइरहेको अवस्था देख्दछु । एक त स्वास्थ्य बीमा लगभग २/३ महिना लाग्छ । त्यो सुविधा पाउनका लागि स्वीकृतिका लागि । पाइसकेपछि पनि त्यस एक लाखको मात्रै सुविधा पाउने अवस्था छ । त्यसमा पनि फरक क्षमता भएका व्यक्तिहरुका लागि चाहिने स्वास्थ्य सामग्रीहरु नपर्ने रहेछ । त्यो पनि समेटिन आवश्यक छ । त्यसका लागि नीति निर्माण स्तरमा नै काम गर्नुपर्छ । त्यसका लागि हामी लाग्नेछु भन्ने प्रतिवद्धता व्यक्त गर्न चाहन्छु ।’

सांसद कार्कीले फरक क्षमता भएका व्यक्तिमैत्री हुनेगरी सेवा प्रदान गर्न बैंक तथा वित्तीय संस्थाहरुको पनि ध्यानाकर्षण गराउनु भयो । कार्यक्रममा फरक क्षमता भएका व्यक्तिहरुका लागि विशेष व्यवस्था गर्न अझै गम्भिर नभएको भन्दै सरकारको आलोचना गरिएको थियो ।

डा.तोसिमा कार्कीराष्ट्रिय स्वतन्त्र पार्टी

प्रकाशित मिति: शुक्रबार, चैत्र १०, २०७९, ५:५३ बेलुका

लेखक: समाचारपाटी