होटल संघ पोखराको साधारणसभा सम्पन्न • Nepal's Trusted Digital Newspaperहोटल संघ पोखराको साधारणसभा सम्पन्न • Nepal's Trusted Digital Newspaper
  • होमपेज
  • होटल संघ पोखराको साधारणसभा सम्पन्न

होटल संघ पोखराको साधारणसभा सम्पन्न

  • समाचारपाटी
  • शुक्रबार, भदौ २४, २०७९
होटल संघ पोखराको साधारणसभा सम्पन्न

पोखरा । निर्माणको अन्तिम चरणमा पुगेको पोखरा अन्तर्राष्ट्रिय विमानस्थल तोकिएकै मितिमा संचालनका लागि आवश्यक तयारी तीव्र पार्न सरोकारवालाहरुले जोड दिएका छन् ।

होटल संघ पोखरा नेपालको ४१ औं वार्षिक साधारण सभाका अवसरमा वक्ताहरुले उक्त विमानस्थल संचालनमा ल्याउने क्रममा पहिलो उडान अन्तर्राष्ट्रिय प्रकृतिको नै हुनुपर्ने माग गरे । कार्यक्रममा बोल्दै संघका अध्यक्ष लक्ष्मण सुवेदीले लामो दवावपछि विमानस्थलको निर्माण कार्य अनसन नै बसेर सुरुवात गराउनुपरेको स्मरण गराउनुभयाे । उहाँले नयाँ विमानस्थललाई घरेलु विमानस्थलका रुपमा अगाडि बढाउने चलखेल हुन सक्ने भन्दै त्यसविरुद्ध सम्पूर्ण गण्डकी प्रदेशवासी एक हुनुपर्ने भनाई राख्नुभयाे ।

सो अवसरमा बोल्दै पोखरा पर्यटन परिषद्का अध्यक्ष पोमनारायण श्रेष्ठले विमानस्थल संचालनमा ल्याउनुपूर्व गर्नुपर्ने रिट्ठेपानी डाँडाको कटान र ल्याण्डफिलसाइटको स्थान्तरण समयमै हुनुपर्नेमा जोड दिनुभयाे । उहाँले डाँडो कटान सक्न ६ महिना सम्मको अवधि लाग्ने कुरा समेत उठेको भन्दै यसले विमानस्थलको संचालन पछि धकेल्नसक्नेतर्फ ध्यानाकर्षण गराउनुभयाे । आवश्यक परे परिषद् र यस अन्तर्गतका संस्थाहरु डोजर लिएर डाँडो काट्न जानुपर्ने भनाई पनि उहाँले राख्नुभयाे ।

यसअघि पोखरा महानगरपालिकाका प्रमुख धनराज आचार्यले कार्यक्रमको उद्घाटन गर्नुभएकाे थियाे । उहाँले पोखराको विकासका लागि आफू दिनरात नभनी खटिरहेको बताउँदै पोखरालाई पर्यटकीय राजधानी घोषणा गर्ने सवालदेखि विमानस्थल संचालनसम्मका कामप्रति आफू सचेत रहेको भनाई राख्नुभयाे ।

‘पोखरा अन्तर्राष्ट्रिय विमानस्थल संचालन  पोखरा र गण्डकी प्रदेशको पर्यटन’ उद्घोषसहित संघले आयोजना गरेको साधारणसभामा बोल्दै होटल संघ नेपाल (हान) की अध्यक्ष सिर्जना राणाले पोखरालाई पर्यटकीय राजधानी घोषणा गर्ने सवालमा केन्द्रिय हानको पूर्ण सहयोग रहने भनाई राख्नुभयाे । अब सरकारको मात्र मुख ताकेर बस्ने अवस्था नभएको भन्दै उहाँले प्रबद्र्धन लगायतका काममा व्यवसायी आफैं अगाडि बढ्नुपर्ने वेला आएको बताउनुभयाे ।

पर्यटक आगमन दरको अवस्था हेर्दा अहिले पनि नेपालको पर्यटन जटिल अवस्थामा रहेको पुष्टी हुने उहाँले सुनाउनुभयाे । जमना अनुसार अहिले डिजिटल र आधुनिक मार्केटिङमा जोड दिनुपर्ने अवस्था आएको बताउँदै उहाँले कुन प्रकारका पर्यटक हामीले भित्र्याउन खोजेको हो त्यसमा प्रष्ट हुनुपर्ने भनाई राख्नुभयाे । सरकारले पर्यटन क्षेत्रलाई पनि उद्योगको मान्यता दिनुपर्ने माग राख्दै उहाँले चालू बजेटमा पर्यटनका लागि विगतमा जस्तो राहातका कार्यक्रम नसमेटिनु आश्चर्यलाग्दो भएको बताउनुभयाे ।

हानका केन्द्रिय सदस्य एवं होटल संघ पोखरा नेपालका सल्लाहकार भरतराज पराजुलीले पृथ्वीराजमार्गको मुग्लिन पोखरा खण्ड र महेन्द्र राजमार्गको वुटवल नारायणगढ खण्डमा सडकको स्तरोन्नती अति सुस्त गतिमा हुँदा पर्यटनलाई असर परेको बताउनुभयाे । यसकारण पनि पोखराको नयाँ विमानस्थल यथासक्य शीघ्र संचालनमा ल्याई रातिमा समेत उडान हुने व्यवस्था गर्नुपर्ने भनाई पराजुलीले राख्नुभयाे ।

होटल संघ नेपाल गण्डकीका अध्यक्ष हरिप्रसाद शर्मा गैह्रेले कोभिडपछि पनि सरकारले चर्को कर असुल्न नछाडेको भन्दै पर्यटन क्षेत्रमा मजदूरका लागि व्यवस्था गरिएको १० प्रतिशत सेवा शुल्क दुईतीन बर्ष स्थगित गर्न सके कोभिडले थला परेको पर्यटन क्षेत्र अघि बढ्न सहज हुने भनाई राख्नुभयाे । उहाँले घण्टा प्रणालीको आधारमा मजदूरलाई काम लगाउने व्यवस्था पनि सुरु गर्नुपर्ने वेला आएको बताउनुभयाे । सो अवसरमा संघका महासचिव राजेन्द्र ढकालले संघले एक बर्षमा गरेका र आगामी कार्यक्रमबारे अवगत गराउनुभएकाे थियाे ।

कार्यक्रममा वक्ताहरुले कोभिडपछि पर्यटन क्षेत्र विस्तारै लयमा फर्के पनि सरकारले गतबर्षजस्तो राहातका कार्यक्रम नल्याएको गुनासो गरेका थिए । कोभिडका वापजूद होटल क्षेत्र हतोत्साही नभएको होटल संघ पोखरा नेपालका अध्यक्ष सुवेदीले भनाई राख्नुभएकाे थियाे । कोभिडका कारण धेरै मजदूर र व्यवसायी पलायन भएको स्मरण गराउँदै उहाँले व्यवसायीका समस्या बुझ्ने र सोही अनुसारको कानून बनाउने सरकार जरुरी भएको भनाई राख्नुभयाे ।

नेपाल पत्रकार महासंघ गण्डकीका महासचिव गोविन्द सुवेदी र होटल संघ पोखरा नेपालका प्रथम उपाध्यक्ष दीपक श्रेष्ठले पनि कार्यक्रममा भनाई राख्नुभएकाे थियाे ।

 

आजको ट्रेन्डिङ समाचार

धेरै कमेन्ट गरिएका