गजलकार जय गौडेललाई गजल प्रतिभा पुरस्कार • Nepal's Trusted Digital Newspaperगजलकार जय गौडेललाई गजल प्रतिभा पुरस्कार • Nepal's Trusted Digital Newspaper
  • होमपेज
  • गजलकार जय गौडेललाई गजल प्रतिभा पुरस्कार

गजलकार जय गौडेललाई गजल प्रतिभा पुरस्कार

  • समाचारपाटी
  • बुधबार, भदौ ८, २०७९
गजलकार जय गौडेललाई गजल प्रतिभा पुरस्कार

पोखरा । गजल प्रतिभा पुरस्कार -२०७९ युवा गजलकार जय गौडेललाई प्रदान गरिने भएको छ । समाजसेवी लालबहादुर गुरुङद्वारा स्थापित तथा गजल सन्ध्या, पोखराद्वारा सञ्चालित पुरस्कार नगद रु १५ हजार ५ सय ५५, दोसल्ला र सम्मानपत्र रहेको छ । सन्ध्याले मोती जयन्तीका अवसरमा एक वर्ष गजल प्रतिभा पुरस्कार तथा अर्को वर्ष गजल प्रतिभा सम्मान अर्पण गर्दै आएको छ ।

यस वर्षको पुरस्कार गजलकार गौडेललाई आगामी भदौँ ११ गते शनिबार १ सय ५७ औँ मोती जयन्तीका अवसरमा पोखराको न्युरोडस्थित रिडर्स कर्नरमा हुने एक विशेष कार्यक्रममा प्रदान गरिने सन्ध्याका उपाध्यक्ष सुरज उपाध्यायले जानकारी दिनुभयाे । सन्ध्याका पूर्व अध्यक्ष दीपक समीपको संयोजकत्वमा पूर्व अध्यक्षद्वय रुपिन्द्र प्रभावी र कपिल शर्मा सदस्य तथा अध्यक्ष वसन्त विनोद र सचिव त्रुपक पदेन सदस्य रहेको प्रतिभा छनोट समितिको सिफारिसमा गजलकार गौडेललाई पुरस्कार प्रदान गर्ने निर्णय गरिएको सन्ध्याले जनाएको छ ।

स्याङ्जाको अर्जुनचौपारीमा वि. सं. २०४१ मा जन्मेका गजलकार गौडेलको ‘आशाका बयलीहरू’ नामक गजलसङ्ग्रह २०६४ मा प्रकाशित छ । अनाममण्डलीका पूर्व महासचिव गौडेल रचना वाचन युट्युब च्यानलका संयोजक पनि हुनुहुन्छ । शिक्षणसँगै साहित्यिक क्षेत्रमा क्रियाशील उहाँ गजलकार, गीतकार र कविका रूपमा चर्चित छन् । उहाँको तरन्नुम शैलीको गजल प्रस्तुतिले पाठक र स्रोता मन्त्रमुग्ध हुने गरेका छन् ।

यसअघि सो पुरस्कारबाट रुपक वनबासी, इन्द्रकुमार विकल्प, गोविन्दराज विनोदी, कमल पौडेल ‘अथक’, दीपक समीप, आर. के. अदिप्त गिरी, कपिल शर्मा, जनार्दन दाहाल, जीवनपानी, बाबु त्रिपाठी र निरज भट्टराई पुरस्कृत भइसकेका छन् । पुरस्कार अर्पण कार्यक्रमसँगै नेपाली गजलमा मोतीरामको योगदानको चर्चासमेत गरिने अध्यक्ष वसन्त विनोदले जानकारी दिनुभयाे ।

 

आजको ट्रेन्डिङ समाचार

धेरै कमेन्ट गरिएका