कर्णालीमा चलचित्र कार्यशाला • Nepal's Trusted Digital Newspaperकर्णालीमा चलचित्र कार्यशाला • Nepal's Trusted Digital Newspaper
  • होमपेज
  • कर्णालीमा चलचित्र कार्यशाला

कर्णालीमा चलचित्र कार्यशाला

  • समाचारपाटी
  • बिहिबार, असार १६, २०७९
कर्णालीमा चलचित्र कार्यशाला

सुर्खेत । कर्णालीका २० जना नव सिनेकर्मीहरु यतीबेला सुर्खेतमा फिल्म सिक्न व्यस्त छन् । कर्णाली प्रदेशमा पहिलो पटक केबी इन्टरटेनमेन्ट एन्ड ग्रुपको आयोजना सुरु भएको ‘कर्णाली चलचित्र कार्यशाला–२०७९’ मा उनीहरु सिनेमा सिक्न व्यस्त भएका हुन् ।
कर्णाली प्रदेशका मुख्यमन्त्री जीवनबहादुर शाहीले ‘एक्सन कट’ भन्दै निर्देशन गरेर यो कार्यशालाको उद्घाटन गर्नुभयाे । उहाँले कार्यक्रममा भन्नुभयाे ,‘कर्णालीलाई हेर्ने नजर अब परिवर्तन गरौं । किनकी कर्णाली हरेक दृष्टीकोणले धनी छ ।’ यो कार्यशालामा सहभागी भएकाहरुले सिनेमा सिकेर कर्णालीको जन जीवन र यहाँको संस्कृतिलाई सिनेमामा उतार्ने विश्वास मुख्यमन्त्री शाहीले सो कार्यक्रममा व्यक्त गर्नुभयाे ।

यो कार्यशालामा कर्णालीबासीले उत्साहका साथ चलचित्र सिकिरहेको कार्यशालाको स्थानीय सँयोजन हरि बिष्टले बताउनुभएकाे छ । उहाँहरु फिल्ममा आउने बिष्टको विश्वास छ । १४ असारबाट सुरु भएको यो कार्यशाला १९ असारसम्म एक साता चल्ने छ । कार्यशालामा यतीबेला चलचित्र निर्माण अन्तर्गत अभिनय, छायाँकन, सम्पादन, चलचित्र लेखन, निर्माण र चलचित्र निर्देशन सम्बन्धि  प्रशिक्षण चलिरहेको छ ।

जस अन्तर्गत कार्यशालामा अभिनेता भोलाराज सापकोटाले अभिनय, बिष्णु कल्पितले छायाँकन, प्रितम पाण्डेले सम्पादन, शिवम अधिकारीले चलचित्र लेखन र डब्बु क्षत्रीले फिल्म प्रोडक्सन तथा निर्देशनको प्रशिक्षण दिईरहनुभएकाे छ । यस्तै अग्रज चलचित्र निर्देशक तथा अभिनेता नीर शाहले यो कार्यशालामा आफ्नो अनुभव आदन प्रदान सहितको मास्टर क्लास लिने यस कार्यक्रमका संयोजक राजु केसीले बताउनुभएकाे छ।

चलचित्र विकाश बोर्ड, नेपाल टेलिकम, दुरसँचार प्राधिकरण, कर्णाली प्रदेशको सामाजिक विकाश मन्त्रालय, दुल्लु साँस्कृतिक संग्रहालय दैलेख, सुर्खेत नगरपालिकालगायतको सहकार्यमा यो कार्यशाला भईरहेको पनि केसीले जानकारी गराउनुभएकाे छ ।

कार्यशालामा कर्णाली प्रदेशका विभिन्न जिल्लाका प्रशिक्षार्थीहरु सहभागी भएको आयोजक संस्था केबी इन्टरटेनमेन्ट एन्ड ग्रुपका अध्यक्ष भूपेन्द्र कुमार खड्काले बताउनुभयाे,‘यो कार्यशालामा हामीले अहिले चलचित्र निर्माण सम्बन्धि एक साताको बेसिक कोर्स सिकाईरहेका छौं र कार्यशाला सम्पन्न भएपछि विधार्थीहरु समुहमा विभाजन भएर हरेक समुहबाट एक एक वटा लघू चलचित्र पनि बनाउने छन् ।’ उहाँले चलचित्र सम्बन्धि यस्ता प्रशिक्षण मुलक कार्यक्रम कर्णाली प्रदेशमा आगामी दिनमा पनि आयोजना गरिने बताउनुभयाे । अब आफुले निर्माण गर्ने नयाँ चलचित्रमा अहिलेको जनशक्तिलाई अवसर दिने पनि उहाँले प्रतिबद्धता जनाउनुभयाे ।

आजको ट्रेन्डिङ समाचार

धेरै कमेन्ट गरिएका