शाहिल, श्रृष्टि र दर्शिल उदियमान खेलाडीको मनोनयनमा • Nepal's Trusted Digital Newspaperशाहिल, श्रृष्टि र दर्शिल उदियमान खेलाडीको मनोनयनमा • Nepal's Trusted Digital Newspaper

हालको खबर

  • होमपेज
  • शाहिल, श्रृष्टि र दर्शिल उदियमान खेलाडीको मनोनयनमा

शाहिल, श्रृष्टि र दर्शिल उदियमान खेलाडीको मनोनयनमा

  • समाचारपाटी
  • बुधबार, असार १५, २०७९
शाहिल, श्रृष्टि र दर्शिल उदियमान खेलाडीको मनोनयनमा

पोखरा । ‘छैटौं पोखरा स्पोर्टस् अवार्ड २०७८’ यहीं असार १८ गते पोखरा सभागृह हलमा हुने निश्चित भएपछि अवार्डको रौनक बढ्न थालेको छ । खेल क्षेत्रमा अगाडि बढेका खेलाडी, प्रशिक्षक, खेलसंघ र खेल पत्रकारलाई अवार्ड प्रदान गरेर खेल क्षेत्रमा थप क्रियाशिल बन्न हौसला प्रदान गर्ने उद्धेश्यले आयोजना हुने कार्यक्रमप्रति खेलप्रेमीको साथ रहने गरेको छ ।

अवार्ड अन्तर्गत वर्ष उत्कृष्ट उदियमान खेलाडी विधाको उत्कृष्ट तीन मनोनयनमा टेनिसका दर्शिल श्रेष्ठ, क्रिकेटकी श्रृष्टि जैशी र बक्सिङका शाहिल लिम्बु पर्नुभएकाे छ । उहाँहरुमध्ये अवार्ड कसको पोल्टामा पर्छ शनिबारसम्म कुर्नुपर्ने भएको छ । यो अवार्ड विजेताले नगद पैतिस हजार रुँपैयाको साथमा ट्रफी हात पार्नेछन् ।

शाहिल लिम्बु :- लाहुरे बन्ने हुटहुटीले बक्सर

पोखरा १२ सितलादेवी स्कुलमा कक्षा १० पढ्ने शाहिल लिम्बुको सानैदेखि लाहुरे बन्ने हुटहुटी थियो । तर उहाँको शरिरको बनावट देखेर आकर्षित भएका घर छेउका अंकलहरुले लोक गुरुङको भूपू बक्सिङ सेन्टरमा लगेर भर्ना गरिदिनुभयाे । विस्तारै उहाँ बक्सिङ प्रति आकर्षित हुन थाल्नुभयाे । लोक गुरुङकै प्रशिक्षणमा उहाँ पोख्त हुँदै जानुभयाे ।

उमेरले १५ लाग्नुभएका शाहिल पढाईसँगै बक्सिङलाई अघि बढाइरहनुभएकाे छ । प्रशिक्षण सुरु गर्नुभएका शाहिलले एक वर्षपछि नै प्रतियोगितामा खेल्ने अवसर जुर्यो । २०७७ मा पोखरा रंगशालामा भएको हिरोज कप इन्डोर नेपाल इन्भिटेशनल बक्सिङ टुर्नामेन्टमा उहाँले सहभागिता जनाउनुभयाे । त्यसमा उहाँ भारत कै खेलाडीसँग पराजित हुनुभयाे । त्यो हारले उहाँलाई आगामी खेलमा दरो भएर उत्रने प्रेरणा जगायो । शाहिल झनै प्रशिक्षण व्यस्त हुने थाल्नुभयाे ।

२०७८ सालमा काठमाडौंमा स्कुल नेशनल बक्सिङ प्रतियोगिता भयो । त्यहाँ पनि उहाँको सहभागिता रह्यो । उहाँ त्यहाँ सहभागितामा मात्रै हुनुभएन् नेपालभरबाट जम्मा भएका बक्सरहरुसँग खेल्दा उहाँ सफल हुनुभयाे । उहाँले गोल्ड मेडल नै हात पार्नुभयाे । अहिलेसम्मको बक्सिङ करियरमा उहाँको यो नै सबैभन्दा ठूलो सफलता हो । त्यसलगत्तै पोखरामा फेरी हिरोज कप इन्डोर नेपाल इन्भिटेशनल बक्सिङ टुर्नामेन्ट आयोजना भयो । पहिलो वर्ष व्यहोरेको हारको बदला लिनु थियो, उहाँलाई । उहाँ त्यसका लागि तयारी गर्न थाल्नुभयाे । भर्खर मात्र गोल्ड मेडल जितेको खुसी र उत्साह त थियो तर भारतबाट खेलाडी आउने भएपछि तयारीलाई अझ निखारे र होमिए प्रतियोगितामा । उहाँले त्यसमा गोल्ड मेडल जितेर पहिलेको हारको बदला लिनुभयाे ।

अहिले उहाँ नवौं खेलकुदको तयारीमा हुनुहुन्छ । नवौंमा सहभागी भएर कास्की जिल्लासँगै गण्डकी प्रदेशकै नतिजामा सुधार ल्याउने उहाँको ध्याउन्न छ । उनको खेल जीवनमा बाबा रुकमान र आमा मञ्जु लिम्बुको राम्रो साथ छ । अहिलेलाई पढाईसँगै बक्सिङमा ध्यान दिने र पछि लाहुेर देखाउने पनि उनको धोको छ ।

नेपाल खेलकुद पत्रकार मञ्च गण्डकीको छैटौं पोखरा स्पोर्टस् अवार्डमा उदियमान खेलाडीतर्फ मनोनयनमा परेकोमा आफूलाई निकै खुसी लागेको प्रतिक्रिया दिनुभयाे ।

श्रृष्टि जैसी :- अलराउण्डर

क्रिकेटमा अलराउण्डर प्रदर्शन क्षमता कमै खेलाडीमा हुन्छ । व्याटिङ, बलिङ र फिल्डिङमा जम्ने कमै खेलाडी मध्ये एक हुन्  महिला क्रिकेट खेलाडी श्रृष्टि जैसी । उमेरले १९ लागेकी श्रृष्टि यू–१९ नेपाली महिला क्रिकेटमा नाम चलेकी खेलाडी हुनुहुन्छ  । कक्षा ७ मा पढ्दा होस्टेलमा बस्ने दाइहरुले खेलेको देखेर क्रिकेटमा होमिएकी जैसीलाई सोही समयमा प्रतिभा देखाउने राम्रो मौका आयो । राष्ट्रिय खेलाडी करण केसीले पोखरा नदीपुरमा सञ्चालन गरेको राइजिङ क्रिकेट एकेडेमीमा प्रतियोगिता चलिरहेको समयमा टिम नपुगेपछि जैसीलाई होस्टेलबाट लगेर खेलाइएको थियो । उक्त प्रतियोगितामा जैसीले सबैको मन जित्नुभयाे । त्यसपछि जैसीलाई एकेडेमीकै सदस्यहरुले नियमित क्रिकेट अभ्यास गर्न सुझाए । त्यसका लागि कास्कीको अन्नपूर्ण गाउँपालिका ११ घान्द्रुकमा रहेका बाबा मितप्रसाद जैसी र आमा माया जैसीलाई उहाँहरुले नै सम्झाइदिनुभयाे ।

त्यसपछि उहाँको क्रिकेटको करियर सुरु भयो । नियमित प्रशिक्षणमा जान थाल्नुभयाे उहाँको खेल निखारिदै गयो । ट्रेनिङकै दौरानमा उहाँको टिम धनगढी र महेन्द्रनगरमा पिएम कप खेल्न गयाे । त्यस लगत्तै उहाँ आठौं राष्ट्रिय प्रतियोगिता खेल्न दाङमा पुग्नुभयाे । ती प्रतियोगिताहरुमा उहाँ सहभागी मात्र हुनुभयाे । त्यो समयसम्म उहाँको खेलमा निखारता आईसकेको थियो । उहाँ ९ कक्षामा पढ्ने बेलामा देशकै प्रतिनिधित्व गर्दै यू–१९ खेल्न चिन जानुभयाे । चिनमा उहाँको टिम तेस्रो स्थानमा पुग्यो । उहाँले आफ्नो जीवनमा अहिलेसम्म कै राम्रो एचिभ्मेण्ट त्यही प्रतियोगितालाई ठान्नुहुन्छ । त्यो समयमा उहाँले एकेडेमी पनि परिवर्तन गरिसक्नुभएकाे थियाे । करण केसीको एकेडेमी बन्द भएपनि उहाँ रिजन प्रजुको एकेडेमीमा जोडिनुभएकाे थियाे । १० मा पढ्ने समयमा उहाँ टियू ग्राउण्मा भएको वमन च्याम्पियन लिग खेल्न पुग्नुभयाे । त्यस लगत्तै उहाँ मलेसियामा यू–१९ खेल्न पुग्नुभयाे । टिमले भनेजस्तो गर्न नसकेपनि उहाँले यू–१९ प्रतियोगितामा वमन अफ दी म्याच हुन सफल हुनुभएकाे थियाे ।

नवौं राष्ट्रिय खेलकुदका लागि तयारी गरिरहेकी श्रृष्टिको लक्ष्य भनेको अब क्रिकेटमा सिनियर महिला टिमका लागि छनोट हुने रहेको छ । नेपाल खेलकुद पत्रकार मञ्च गण्डकीको छैटौं पोखरा स्पोर्टस् अवार्डमा उदियमान खेलाडीतर्फ मनोनयनमा परेकोमा आफूलाई निकै खुसी लागेको प्रतिक्रिया दिनुभयाे ।

दर्शिल श्रेष्ठ :- बाबुको पछि लाग्दा खेलाडी बनेका

उमेरले १३ मा टेकेका दर्शिल श्रेष्ठ सानैदेखि बाबुको पछि लागेर टेनिस कोर्टसम्म पुग्नुहुन्थ्याे । बाबु नबिन श्रेष्ठ र आमा प्रिया श्रेष्ठको साथबाटै टेनिसमा होमिएका श्रेष्ठ पछिल्लो समय प्रतियोगिता खेल्दै नेपालका धेरै स्थानहरुमा पुगिरहनु हुन्छ ।

५÷६ वर्षदेखि टेनिसको र्याकेट समाउन सुर गर्नुभएका दर्शिलले ९ वर्षको हुँदा प्रतियोगिता खेल्नुभएको हाे । पोखरामा भएको लिटिल एन्जल कपमा सहभागीता जनाउनुभएका उहाँले उपाधि जित्न त सक्नुभएन तर अनुभव भने राम्रै बटुल्नुभयाे । सन् २०२१ मा फेब्रुअरी १४ देखि १८ सम्म ललितपुरमा धाएको टिम टेनिस नेपाल इनरेगुलर जुनियर प्रिमियर टेनिस टुर्नामेण्टमा उहाँ च्याम्पियन बन्नुभएकाे थियाे । त्यसपछि सन् २०२१ अप्रिलमा भएको जेटिआई ग्राण्ड जुनियर ओपन टेनिसमा विजेता बन्नुभएकाे थियाे ।

२०७८ साल अर्थात २०२१ भने उहाँका लागि निकै फलदायी बन्यो । सबैभन्दा बढि उपाधी र उपलब्धी उहाँले २०७८ मा पाउनुभएकाे छ । सोही वर्ष उहाँ टेनिसमा यू–१२ मा नेपाल नम्बर एक खेलाडी बन्नुभयाे । यो नै उहाँको अहिलेसम्मको खेल जीवनको सबैभन्दा ठूलो उपलब्धी हो । उहाँ आइटिएफ एसियन यू १२ मा तेस्रो बन्नुभयाे । यस्तै मिडकोर्ट एसियन फेडेरेसन च्याम्पियनसिपमा छैटौं स्थानमा रहनुभयाे । यस्तै एसियन टेनिस फेडेरेसनको २ सय ५१ र्रयाकिङमा पर्नुभयाे । भुपु खेलाडी मञ्चले राईजिङ प्लेयरका रुपमा सम्मान गर्यो । विभिन्न प्रतियोगितामा आफूलाई अब्बल बनाउँदै एसियन टेनिस फेडेरेसनको २ सय ५१ र्याकिङबाट ६५ औं स्थानमा पुग्नुभयाे । यस्तै बिर गणेशमान सिंह नेशनल टुर्नामेन्ट पुरुष तर्फ सिंगलमा विजयी र डबलमा उपविजेता बन्नुभयाे । एसियन यू–१४ टेनिसमा सिंगलतर्फ तृतिय र डबलमा द्वितिय बन्नुभयाे । आगामी दिनमा टेनिससँगै बढाईलाई अगाढि बढाउने सोंचमा हुनुहुन्छ, उहाँ ।

नेपाल खेलकुद पत्रकार मञ्च गण्डकीको छैटौं पोखरा स्पोर्टस् अवार्डमा उदियमान खेलाडीतर्फ मनोनयनमा परेकोमा आफूलाई निकै खुसी लागेको प्रतिक्रिया दिनुभयाे ।

विश्व खेलकुद पत्रकार दिवसको अवसर पारेर मञ्चले वर्ष उत्कृष्ट उदियमान खेलाडी सहित लाइफटाइम अचिभमेन्ट अवार्ड, वर्ष खेलाडी पुरुष, वर्ष खेलाडी महिला, उत्कृष्ट प्रशिक्षक, उत्कृष्ट खेल संघ र उत्कृष्ट खेल पत्रकारलाई अवार्ड वितरण गर्ने मञ्चका महासचिव राजाराम पौडेलले बताउनुभयाे ।

पोखरा सभागृह हलमा आयोजना हुने पोखरा स्पोर्टस् अवार्ड कार्यक्रमलाई गण्डकी प्रदेश सरकार, पोखरा महानगरपालिका, एम ए कस्ट्रक्सन प्रालि, सहारा क्लब पोखरा, नेपाल भूतपुर्व खेलाडी मञ्च, तमु धिं युके, आव्या क्लब, होटल पौवा लेकसाइड, जु जु वेर्यस, सिटीवान टेलिभिजन, चिल्लिबार एण्ड रेष्टुरेन्ट, साइमन पार्टी प्यालेस, वल्डलिंक, फिस्टेल हस्पिटल, युनाइटेड क्लब, अमेरिकाबाट सरीता गुरुङ, जापानबाट मोहन घले, मनकामना पेट्रोलपम्प, सिटीजन फर्निचर लगायतले सहयोग गरेका छन् ।

अवार्ड कार्यक्रमलाई भव्य बनाउन विभिन्न समिति तथा उपसमिति मार्फत कामलाई तिव्रता दिएको छ । मञ्चले २०७२ सालदेखि पोखरामा निरन्तर स्पोट्र्स अवार्ड कार्यक्रम गर्दै आएको छ । मञ्चले अवार्ड कार्यक्रमको तयारीलाई तिव्रता दिएको अध्यक्ष दीननाथ बरालले बताउनुभयाे ।

 

आजको ट्रेन्डिङ समाचार

धेरै कमेन्ट गरिएका