'गरिबीका कारण पढ्न नपाएका बालबालिकालाई निशुल्क पढाउँछौं' : अध्यक्ष बानियाँ • Nepal's Trusted Digital Newspaper'गरिबीका कारण पढ्न नपाएका बालबालिकालाई निशुल्क पढाउँछौं' : अध्यक्ष बानियाँ • Nepal's Trusted Digital Newspaper
  • होमपेज
  • ‘गरिबीका कारण पढ्न नपाएका बालबालिकालाई निशुल्क पढाउँछौं’ : अध्यक्ष बानियाँ

‘गरिबीका कारण पढ्न नपाएका बालबालिकालाई निशुल्क पढाउँछौं’ : अध्यक्ष बानियाँ

  • समाचारपाटी
  • आइतवार, असार ५, २०७९
‘गरिबीका कारण पढ्न नपाएका बालबालिकालाई निशुल्क पढाउँछौं’ : अध्यक्ष बानियाँ

ठूलीमजुवास्थित बाटोको समुद्घाटन, ज्येष्ठ नागरिकलाई सम्मान

पोखरा। ठूलीमजुवा स्थित संरचना टोलको बाटो समुद्घाटन कार्यक्रम सम्पन्न भएको छ। पोखरा महानगरपालिका वडा नं –१५ ठूलीमजुवा स्थित गल्ली नं –३ को नयाँ ढलान बाटोको वडाध्यक्ष तोरण बहादुर बानियाँले समुद्घाटन गर्नुभएकाे हाे।

समुद्घाटनपछि आयोजित कार्यक्रमलाई सम्बोधन गर्दै अध्यक्ष बानियाँले निर्वाचनका बेला व्यक्त गरिएका प्रतिवद्धता अनुरुप पोखरा –१५ लाई ३३ वटै वडा मध्ये नमुना र सभ्य नागरिक बसेको वडा बनाउने अभियानमा लागेको  बताउनुभयाे। उहाँले पूर्वाधारको विकासले मात्र नमुना वडा नबन्ने भन्दै वडाका प्रत्येक दिदीबहिनी र युवाहरु स्वरोजगारतर्फ उन्मुख हुनुपर्ने र त्यसका लागि आधारहरु तयार गर्नुपर्ने बताउनुभयाे। अध्यक्ष बानियाँले अघिल्ला वर्षहरुमा पनि धेरै पूर्वाधारका कामहरु भइसकेको भन्दै अब महलमा बस्ने व्यक्तिहरुको मात्र आवश्यकतालाई नहेरी झुपडीमा बस्ने जनताको आवश्यकता पूर्ति गर्नतर्फ सोच्नुपर्नेमा जोड दिनुभयाे ।

बानियाँले आफू पनि यही ठाउँमा जन्मिएको र यही स्थानमा खेलेको स्मरण गर्दै आफ्नो व्यक्तिगत स्वार्थबाट माथि उठेर समाज निर्माणका लागि अगाडि बढ्नुपर्ने बताउनुभयाे। उहाँले वडा नं –१५ मा रहेका सार्वजनिक जग्गाहरुलाई संरक्षण गर्दै ती स्थानमा आवश्यकता हेरी खेलकुद र व्यायमशाला बनाउने योजना रहेको सुनाउनुभयाे। वडा नं –१५ मा आर्थिक दुरावस्थाका कारण विद्यालय जान नपाएका जो कोही बालबालिकाका लागि निशुल्क एसईई सम्म पढ्ने सुनिश्चितताको ग्यारेन्टी गर्ने अध्यक्ष बानियाँले जिकिर गर्नुभयाे।

अध्यक्ष बानियाँले वडा नं –१५ लाई आलुको पकेट क्षेत्रको रुपमा विस्तारका लागि एक खेतिको नीति ल्याइनुका साथै खेलकुदका लागि अन्तर विद्यालय स्तरीय प्रतियोगिताका धेरै कार्यक्रम ल्याइने बताउनुभयाे। उहाँले महलदेखि झुपडीमा बस्नेहरुको मागलाई सम्बोधन गर्ने गरी बजेट ल्याएको भन्दै अबका योजनाहरुलाई पूरा गर्न सम्पूर्ण वडावासीको सहयोग र समर्थन पाउने आशा व्यक्त गर्नुभयाे।

यस्तै वडा नं –१५ का निवर्तमान वडा अध्यक्ष प्रकाश पौडेलले समुदायसँग मिलेर बस्ती र टोल–टोलमा विकास र परिवर्तनका उल्लेख्य कामहरु गरेको दाबी गर्नुभयाे । उहाँले ५ वर्ष अगाडि ठूलीमजुवा क्षेत्र अत्यन्त विकट र अव्यवस्थित रहेकोमा आफ्नो कार्यकालमा यस क्षेत्रका सडकहरु फराकिलो बनाइनुका साथै थुप्रै स्तरउन्नतीका कामहरु गरिएको बताउनुभयाे। उहाँले यस क्षेत्रका स्थानीयको उत्साह हौसला र मिहेनतले विकासका कामहरु सम्भव भएको दाबी गर्नुभयाे। हिजोका दिनमा गरिएका प्रतिवद्धताहरु पूरा गरेकाले त्यहि मनोविज्ञान र भावना बुझेर अहिलेको निर्वाचनमा पनि जनताले सहज ढंगले सफलता दिलाएको पौडेलले बताउनुभयाे ।

संरचना टोलका कोषाध्यक्ष अर्जुन गुरुङले यसअघि पोखरा बसेपनि पोखरा जस्तो महशुस नभएको बताउनुभयाे। अहिले यस क्षेत्रमा बाटो ढलानसँगै सडक छेउ तारजाली लगाउने काम भएपछि सहज र सुरक्षित भएको प्रतिक्रिया दिनुभयाे। उहाँले अझैपनि खहरेको पानीको व्यवस्थापन, कल्भर्टको निर्माण र गलेश्वर जोड्ने पूल निर्माणका लागि पहल गर्न आग्रह गर्नुभयाे। यसबाहेक ठूलीमजुवादेखि टुटुङ्गा जोड्ने झोलुङ्गे पूल बनाउन जनप्रतिनिधिलाई सुझाउनुभयाे।

टिका कुमारी पाचे ’मगर’ को अध्यक्षतामा भएको उक्त कार्यक्रममा उपभोक्ता समितिका सदस्य नरेन्द्र गुरुङले स्वागत मन्तव्य राख्नुभएकाे थियाे भने, कार्यक्रमको संचालन प्रेम बहादुर रोकाले गर्नुभएकाे थियाे।

कार्यक्रममा संरचना टोल निवासी ६ जना ज्येष्ठ नागरिकलाई दोसल्ला ओढाएर जनप्रतिनिधिहरुले सम्मान गर्नुभएकाे थियाे।

thuli majuwa 2 thuli majuwa 3

आजको ट्रेन्डिङ समाचार

धेरै कमेन्ट गरिएका