क्रिकेट विश्वकप लिग टू:-नेपालले आज ओमानसँग खेल्दै • Nepal's Trusted Digital Newspaperक्रिकेट विश्वकप लिग टू:-नेपालले आज ओमानसँग खेल्दै • Nepal's Trusted Digital Newspaper
  • होमपेज
  • क्रिकेट विश्वकप लिग टू:-नेपालले आज ओमानसँग खेल्दै

क्रिकेट विश्वकप लिग टू:-नेपालले आज ओमानसँग खेल्दै

  • समाचारपाटी
  • बिहिबार, जेष्ठ २६, २०७९
क्रिकेट विश्वकप लिग टू:-नेपालले आज ओमानसँग खेल्दै

काठमान्डौं । आईसीसी क्रिकेट विश्वकप लिग टू अन्तर्गत नेपाल, अमेरिका र ओमान सम्मिलित त्रिकोणात्मक शृंखलामा नेपालले आज ओमानसँग पहिलो खेल खेल्दैछ ।

बुधबारदेखि सुरु भएको श्रृंखलामा ओमान पहिलो खेलमा घरेलु टोली अमेरिकासँग १ सय १४ रनले पराजित भएको थियो । पर्लयाण्डस्थित मोसा क्रिकेट स्टेडियममा ओमानले पहिलो खेल खेलिसक्दा नेपाल भने त्यही टिमसँग आफ्नो पहिलो खेल खेल्न लाग्दैछ । खेल नेपाली समय अनुसार राति सवा ९ बजे सुरु हुनेछ ।

अमेरिकाको फरक कन्डिसनमा खेल्नु अघि नेपालले १० दिनअघि नै अमेरिका गएर लिग टू का लागि तयारी गरेको थियो । त्यहाँको स्थानीय टिमसँग दुई अभ्यास खेल खेल्नुका साथै नेपालले प्रशिक्षण समेत गरेको थियो । त्यसबाट नेपाललाई केही सहयोग पुग्ने विश्वास गरिएको छ । तर ओपनरद्वय आसिफ शेख र कुशल भुर्तेल अभ्यास खेल र प्रशिक्षणका क्रममा घाइते भएपछि नेपाल टिमलाई ओपनिङमै चिन्ता थपिएको छ ।

नेपाल क्रिकेट संघ -क्यान)ले दुवै खेलाडीले पहिलो खेल खेल्ने सम्भावना कम देखेपछि विकेटकिपर ब्याटर सुबास खकुरेललाई अमेरिका पठाइसकेको छ । कुशल र आसिफ फिट नभए टिममा रहेका ओपनर सुनिल धमला र सुबासले नेपालको ओपनिङ गर्ने लगभग पक्का छ ।

आसिफलाई अभ्यास खेल अन्तर्गत नेपाली अल स्टारविरुद्धको खेलअघि अभ्यासको क्रममा घुँडामा चोट लागेको थियो । उहाँले नेपाल र ह्यूस्टन हुरिकेन्सबीचको दोस्रो खेल खेल्नुभएन । कुशललाई हुरिकेन्स विरुद्धको खेलमा फिल्डिङका क्रममा हृयाम्स्ट्रिङ समस्या भएको थियो । त्यसैले पछिल्लो समय जमिरहेको ओपनिङ जोडीमा यस पटक परिवर्तन हुनेछ ।

तेस्रो नम्बरमा देव खनालले ब्याटिङ गर्नुहुनेछ । त्यसपछि दीपेन्द्र सिंह ऐरी, रोहित कुमार पौडेल र आसिफ शेखले नेपालको मिडल अर्डर सम्हाल्नेछन् । कन्डिसन अनुसार सातौं नम्बरमा विनोद भण्डारी र आदिल अन्सारी मध्ये एकले खेल्न सक्नेछन् । तीव्र बलिङमा सोमपाल कामी र करण केसी खेल्नेछन् भने स्पीनमा कप्तान सन्दीप लामिछानेलाई सागर ढकाल वा सुशन भारीमध्ये एकले साथ दिनेछन् ।

source:-onlinekhabar

आजको ट्रेन्डिङ समाचार

धेरै कमेन्ट गरिएका