अधिकृतको सेवाकालीन तालिम अब प्रदेशमै • Nepal's Trusted Digital Newspaperअधिकृतको सेवाकालीन तालिम अब प्रदेशमै • Nepal's Trusted Digital Newspaper
  • होमपेज
  • अधिकृतको सेवाकालीन तालिम अब प्रदेशमै

अधिकृतको सेवाकालीन तालिम अब प्रदेशमै

  • समाचारपाटी
  • बिहिबार, जेष्ठ १९, २०७९
अधिकृतको सेवाकालीन तालिम अब प्रदेशमै

गण्डकी प्रदेश प्रशिक्षण प्रतिष्ठानको परिषद बैठक

पोखरा । गण्डकी प्रदेश प्रशिक्षण प्रतिष्ठानले प्रदेश र स्थानीय तहमा कार्यरत अधिकृत कर्मचारीका लागि सेवाकालीन तालिम पाठ्यक्रम तयार पारेको छ । उक्त पाठ्यक्रम प्रशिक्षण परिषद्को चौथो बैठकले पारित गरेको छ ।

परिषद अध्यक्ष समेत रहनुभएका मुख्यमन्त्री एवं कृष्णचन्द्र नेपाली पोखरेलको अध्यक्षतामा बसेको बैठकले पाठ्यक्रम स्वीकृत गरेको हो । सहायकस्तरका लागि तालिम सञ्चालन हुँदै आए पनि अधिकृत तहका लागि भने प्रदेशमा पहिलोपटक पाठ्यक्रम तयार भएको हो ।

प्रतिष्ठानले तयार पारेको स्थानीय आर्थिक विकास प्रशिक्षण सामग्री मुख्यमन्त्री पोखरेलले विमोचन गर्नुभएकाे छ । प्रदेश र स्थानीय तहका कर्मचारी अनि निर्वाचित जनप्रतिनिधिलाई आवश्यक तालिम, अभिमुखीकरण गराउने लगायत उद्देश्यबाट गठित प्रतिष्ठानले सम्पादन गर्दै आएका कार्य प्रभावकारी भएको मुख्यमन्त्री पोखरेलले बताउनुभयाे । सरकारको काम कारवाहीलाई प्रभावकारी बनाउने जिम्मा कर्मचारी प्रशासनको भएकाले उनीहरुलाई चुस्त र सबल बनाउन नियमित प्रशिक्षण जरुरी रहेको उहाँको भनाइ थियो । जिम्मेवारीमा आएका कर्मचारीको वृत्ति विकासका लागि समेत तालिम जरुरत पर्ने मुख्यमन्त्री पोखरेलले बताउनुभयाे ।

संघीयतालाई मजबुत बनाउने नागरिकका अपेक्षा पूरा गर्न प्रदेश सरकार लागी परेको भन्दै उहाँले स्थानीय तहसँगको समन्वयमा अझ प्रभावकारी काम गर्न सकिने भनाइ राख्नुभएकाे थियाे । सातवटै प्रदेशमध्ये गण्डकीले पहिलोपटक अधिकृतका लागि सेवाकालीन तालिम पाठ्यक्रम तयार पारेको र संघीय मामिला तथा सामान्य प्रशासन मन्त्रालयले समेत यसलाई अनुमति दिइसकेको मुख्यमन्त्री पोखरेलले बताउनुभयाे ।

प्रतिष्ठानका कार्यकारी निर्देशक ऋषिराम पाण्डेले प्रदेश र स्थानीय तहका विभिन्न सेवामा कार्यरत संघीय निजामती सेवाका राजपत्रांकित तृतीय श्रेणी तथा प्रदेश निजामती र स्थानीय सेवाका छैटौं, सातौं र आठौं तहका अधिकृतहरुका लागि सेवाकालीन तालिम सञ्चालनका लागि पाठ्यक्रम तयार पारिएको बताउनुभयाे। उहाँले भन्नुभयाे, ‘पाठ्यक्रममा व्यक्तित्व विकास, कौशल, नेतृत्व र प्रबन्धकीय सीप, अनुसन्धान र नवीनतम ज्ञानका साथै संघ प्रदेश र स्थानीय तहमा निर्वाह गर्नुपर्ने जिम्मेवारी र भूमिकासँग सम्बन्धित विषयवस्तु समावेश छन् ।’

कार्यकारी निर्देशक पाण्डेले स्थानीय आर्थिक विकास, स्थानीय तहको प्रमुख प्राथमिकताको विषय रहेको र सो कार्यलाई प्रभावकारी रुपमा अगाडि बढाउन व्यावहारिक प्रशिक्षणको आवश्यकता रहेकाले प्रशिक्षकका लागि सहयोगी सामग्री तयार पारिएको जानकारी गराउनुभयाे । प्रतिष्ठानले हालसम्म गरेका कार्यप्रगतिका बारेमा समेत बैठकमा उहाँले जानकारी गराउनुभयाे ।

बैठकका प्रदेशका नीति तथा योजना आयोग उपाध्यक्ष डा रघुराज काफ्ले, प्रमुख सचिव रवीलाल पन्थ, मुख्यमन्त्रीका राजनीतिक सल्लाहकार खड्गबहादुर कमाल, मन्त्रालयका सचिवहरु, गण्डकी विश्वविद्यालयका उपकुलपति, परिषद सदस्यहरु सहभागी  हुनुहुन्थ्याे ।

gandaki

आजको ट्रेन्डिङ समाचार

धेरै कमेन्ट गरिएका