मूल्यवृद्धि फिर्ता र पाठ्यपुस्तक अभाव समाधान गर्न माग • Nepal's Trusted Digital Newspaperमूल्यवृद्धि फिर्ता र पाठ्यपुस्तक अभाव समाधान गर्न माग • Nepal's Trusted Digital Newspaper
  • होमपेज
  • मूल्यवृद्धि फिर्ता र पाठ्यपुस्तक अभाव समाधान गर्न माग

मूल्यवृद्धि फिर्ता र पाठ्यपुस्तक अभाव समाधान गर्न माग

  • समाचारपाटी
  • आइतवार, जेष्ठ १५, २०७९
मूल्यवृद्धि फिर्ता र पाठ्यपुस्तक अभाव समाधान गर्न माग

पोखरा । नेकपा एमाले निकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) कास्कीले मूल्यवृद्धि र पाठ्यपुस्तक अभावको समस्या समाधान गर्न सरकारको ध्यानाकर्षण गराएको छ ।

aakhil phoyto 2

प्रमुख जिल्ला अधिकारीमार्फत शुक्रबार प्रधानमन्त्रीलाई पत्र पठाएर संगठनले पेट्रोलियम पदार्थ, खाद्यान्नको मूल्यवृद्धि र पाठ्यपुस्तक अभावबारे सरकारको ध्यानाकर्षण गराएको हो । अनेरास्ववियु कास्की जिल्ला अध्यक्ष विजय पौडेलले प्रमुख जिल्ला अधिकारी जयनारायण आचार्यलाई ध्यानाकर्षण पत्र बुझाउनुभएकाे हाे ।

मूल्यवृद्धि फिर्ता लिइ त्यसको दीर्घकालीन समाधान खोज्न संगठनले माग गरेको छ । ‘पेट्रोलियम पदार्थको मूल्यवृद्धि देखाएर दैनिक उपभोग्य
सामग्रीमा कालोबजारी भइरहेको तथा सार्वजनिक यातायातको भाडा अनियमित भइरहेको छ । तसर्थ खाद्यान्नलगायत दैनिक उपभोग्य सामग्रीहरुको मूल्य नियन्त्रण गरी भएको कालोबजारी अन्त्य गर्न र पटकपटक गरिएको मूल्यवृद्धि फिर्ता लिइ दीर्घकालीन समाधान खोज्न जोडदार माग गर्दछौ,’ ध्यानाकर्षण पत्रमा भनिएको छ ।

विद्यालय खुले पनि पाठ्यपुस्तक अभावले विद्यार्थीको अध्ययनमा असहज अवस्था सिर्जना भएकाले गम्भीर हुन अनेरास्ववियु कास्कीले सरकारसँग माग गरेको छ । ध्यानाकर्षण पत्र बुझाउन केन्द्रीय सदस्य महेन्द्र उपाध्याय र अनुप लामिछाने, जिल्ला उपाध्यक्ष सन्तोष पोखरेल, सचिव विनय पराजुलीलगायत विद्यार्थी नेता शुक्रबार प्रमुख जिल्ला अधिकारीकहाँ पुगेका थिए ।

आफूहरुले राखेका माग पुरा नभए संगठन कडा प्रतिवादमा उत्रने चेतावनी पत्रमार्फत सरकारलाई दिइएको छ । मूल्यवृद्धिपछि चरणबद्ध आन्दोलन सुरु गरेको र माग सुनुवाइ नभए विरोधलाई निरन्तरता दिने जिल्ला सचिव पराजुलीले बताउनुभयाे । पृथ्वीनारायण क्याम्पसअघि
प्रदर्शन गरेर अनेरास्ववियु कास्कीले मूल्यवृद्धिको विरोध सुरु गरेको थियो ।

संगठनले जिल्लाभरका क्याम्पस गेटमा मूल्यवृद्धिको विरोधमा कालो ब्यानर टाँसेर र सरकारी गाडी चलाउन रोक लगाएर अनेरास्ववियुले मूल्यवृद्धिको विरोध गरेको छ ।

आजको ट्रेन्डिङ समाचार

धेरै कमेन्ट गरिएका