वीरगञ्जमा कांग्रेसको विजय उत्सवमा सहभागीमाथि एमालेका उम्मेदवारद्धारा आक्रमण, ६ जना घाइते • Nepal's Trusted Digital Newspaperवीरगञ्जमा कांग्रेसको विजय उत्सवमा सहभागीमाथि एमालेका उम्मेदवारद्धारा आक्रमण, ६ जना घाइते • Nepal's Trusted Digital Newspaper
  • होमपेज
  • वीरगञ्जमा कांग्रेसको विजय उत्सवमा सहभागीमाथि एमालेका उम्मेदवारद्धारा आक्रमण, ६ जना घाइते

वीरगञ्जमा कांग्रेसको विजय उत्सवमा सहभागीमाथि एमालेका उम्मेदवारद्धारा आक्रमण, ६ जना घाइते

  • समाचारपाटी
  • शुक्रबार, जेष्ठ ६, २०७९
वीरगञ्जमा कांग्रेसको विजय उत्सवमा सहभागीमाथि एमालेका उम्मेदवारद्धारा आक्रमण, ६ जना घाइते

वीरगञ्ज । वीरगञ्ज महानगरपालिका–२७ मा नेपाली कांग्रेसको विजय उत्सवमा सहभागीमाथि आक्रमण भएको छ । आक्रमणमा परी विजयी उत्सवमा सहभागी ६ जना स्थानीय घाइते भएका छन् । वडा नम्बर २७ को अध्यक्ष जितेपछि बिहीबार राति कांग्रेसले विजयी उत्सव मनाएको थियो । सो क्रममा नेकपा एमालेका वडाध्यक्षको उम्मेदवारसहितको समूहले र्‍यालीमा सहभागीमाथि आक्रमण गरेको कांग्रेसको आरोप छ ।

आक्रमणमा परी ५८ वर्षीय नेमा रेशा, ३० वर्षीय आइसा भन्ने मुन्नी खातुन, ४० वर्षीय मलिक नुनिया, १८ वर्षीय मोहमद नुराइन, ४२ वर्षीय मोहमद मियाँ र १९ वर्षीय जाहिर हवारी घाइते भएका हुनुभएकाे छ । उहाँहरु मध्ये अधिकांशको टाउकोमा चोट लागेको छ । घाइते सबै जनाको अवस्था सामान्य रहेको जिल्ला प्रहरी कार्यालय पर्साले जनाएको छ । ४ जना उपचारपछि घर फर्किए सक्नुभएकाे छ भने महम्मद मियाँ र आयसा खातुनको नारायणी अस्पतालमै उपचार भइरहेको छ ।

वडा नम्बर २७ को अध्यक्षमा १ हजार ५ सय १६ मत ल्याएर कांग्रेसका हृदयनारायण प्रसाद कुर्मी विजयी हुनुभएकाे थियाे । नेकपा एमालेका प्रदीपकुमार यादव भन्दा ४ सय ५ मत ल्याएर कुर्मी निर्वाचित हुनुभएकाे हाे । प्रदिपले १ हजार १ सय १६ मत पाउनुभयाे । ०७४ को निर्वाचनमा प्रदीप वडाध्यक्षमा निर्वाचित हुनुभएकाे थियाे ।

हृदयले जितेको खुशीमा विजयी उत्सव मनाइरहेको समयमा वडाध्यक्षमा पराजित एमालेका प्रदीपसहितको समूहले लाठीले कुटपिट गरेको घाइतेहरुले बताउनुभएकाे छ ।

प्रदिप सहितका मानिसहरु आएर एमालेलाई भोट नहालेर काँग्रंसको विजयी र्‍यालीमा गएको भन्दै आफूहरु माथि कुटपिट भएको घाइतेहरुले बताउनुभएकाे छ ।

प्रहरीले घटनामा संलग्न भएको आरोपमा वडाध्यक्षमा प्रदिपसहित तीन जनालाई नियन्त्रणमा लिएको छ । प्रदीपसहित ३३ वर्षीय नुर महमद र ३५ वर्षीय शर्माप्रसाद कुशवाहा पक्राउ पर्नुभएकाे हाे ।

घाइतेहरुले घटनामा निवर्तमान वडाध्यक्षमा पराजित उम्मेदवार प्रदीपको प्रत्यक्ष संलग्नता रहेको आरोप लगाएपछि सोधपुछका लागि ल्याइएको पर्साका प्रहरी प्रवक्ता प्रहरी नायब उपरीक्षक ओमप्रकाश खनालले जानकारी दिनुभयाे ।

‘राति विजयी र्‍यालीमा सहभागीलाई पराजित वडा अध्यक्षसहितका मानिसले कुटपिट गरेको भन्ने खबर आयो । प्रहरी पठाएर स्थिति नियन्त्रणमा लियौं,’ उहाँले भन्नुभयाे, ‘कुटपिटबाट ६ जना घाइते पनि भएका छन् । घाइतेहरुको भनाइको आधारमा उनीसहित तीन जनालाई नियन्त्रणमा लिएका हौं । संलग्नता थियो, थिएन अनुसन्धान गरिरहेका छौं ।’

एमालेका तर्फबाट नगर प्रमुख पदका उम्मेदवार विजयकुमार सरावगीले भने कांग्रेसका कार्यकर्ताहरुले जितको उन्मादमा एमालेका कार्यकर्ताहरुलाई जिस्काएकोले घटना भएको बताउनुभएकाे छ । उहाँले घटनामा वडाध्यक्षका उम्मेदवारको संलग्नता नभएको दाबी गर्नुभयाे । ‘ विजयी र्याली निकाल्दा चिढ्याउने काम भयो । त्यसले गर्दा जुन दुर्घटना भयो । त्यो गलत नै हो,’ उहाँले भन्नुभयाे, ‘तर घटनामा जो जो संलग्न छन उनीहरुलाई लैजानुपर्ने हो । प्रहरीले घटना स्थलमै नभएका वडाध्यक्षका उम्मेदवारलाई पक्रेर लगेको छ ।’

 

source:-onlinekhabar

आजको ट्रेन्डिङ समाचार

धेरै कमेन्ट गरिएका