पाल्पाली ढाकाको प्रवर्द्धन अभियान सुरुआत, अन्तराष्ट्रिय ‘ब्राण्डिङ’ गरिँदै • Nepal's Trusted Digital Newspaperपाल्पाली ढाकाको प्रवर्द्धन अभियान सुरुआत, अन्तराष्ट्रिय ‘ब्राण्डिङ’ गरिँदै • Nepal's Trusted Digital Newspaper
  • होमपेज
  • पाल्पाली ढाकाको प्रवर्द्धन अभियान सुरुआत, अन्तराष्ट्रिय ‘ब्राण्डिङ’ गरिँदै

पाल्पाली ढाकाको प्रवर्द्धन अभियान सुरुआत, अन्तराष्ट्रिय ‘ब्राण्डिङ’ गरिँदै

  • समाचारपाटी
  • बिहिबार, फाल्गुन २६, २०७८
पाल्पाली ढाकाको प्रवर्द्धन अभियान सुरुआत, अन्तराष्ट्रिय ‘ब्राण्डिङ’ गरिँदै

पाल्पा। पाल्पामा हस्तकलाका माध्यमबाट उत्पादित पाल्पाली ढाकाको प्रवर्द्धन अभियान थालिएको छ। यहाँका ढाकालाई ‘ब्राण्ड’ बनाएर यसमा आधारित उद्यमीलाई टेवा दिने लक्ष्यसहित सो अभियान सुरुआत गरिएको हो।

लुम्बिनी प्रदेश सरकार, तानसेन नगरपालिका, युके एडको सीप नामक परियोजना र पाल्पाली ढाका सङ्घको साझेदारीमा ‘नेपाली ढाका समृद्धिका लागि साझेदारी’ कार्यक्रम मार्फत ‘ब्राण्डिङ’ गरिँदैछ। ब्राण्डिङ नै गरेर प्रमाणित गरी  पाल्पाली ढाका कपडा चिनाउने अभियानमा जुटेको तानसेन नगरप्रमुख अशोककुमार शाहीले जानकारी दिनुभयाे। नेपाल र नेपालीको ब्राण्डका रूपमा विदेशमा समेत यसले पहिचान बनाएको उहाँले बताउनुभयाे।

जिल्लामा हस्तकलाका माध्यमबाट उत्पादित ढाका कपडा देशभर उपलब्ध गराइने छ। ढाका उद्योगी सागर महर्जनले भन्नुभयाे, ‘अब देशका ठूला सहरमा पाल्पाली ढाका कपडा सहजरूपमा उपलब्ध हुनेछ। यसका लागि पाल्पाली ढाका सङ्घले परियोजनाका माध्यमबाट उत्पादन वृद्धि गर्नेछ।’

सङ्घले निश्चित गुणस्तरसहित ब्राण्ड लिएर पाल्पाली ढाकाको कपडालाई बजारमा लैजाने तयारी गरेको छ। यसमाथि हातबाट बनेको कपडाको गुणस्तर पनि उत्कृष्ट मानिँदै आएको छ। यस्तो कपडालाई अझ बढी प्रचार–प्रसार गर्न सके उद्यमी र व्यापारीलाई मात्र होइन, नेपालकै अर्थतन्त्रमा समेत सहयोग पुग्न सक्छ। आकर्षक ढाका कपडा उत्पादन गर्ने उद्योगमा दक्ष कामदारको अभावले थियो। कामदार अभावमा ढाका कपडा उत्पादन न्यून मात्रा रहेकामा सीप परियोजनाको सहयोगमा अहिले बन्द उद्योग सञ्चालनमा छन्।

पाल्पाली ढाका कपडा पाल्पाको मौलिक पहिचान हो। पाल्पा ढाका उद्योगी सङ्गठित भएपछि ढाका कपडा उत्पादन, विविधिकरण, तयारी पोशाक, बजारीकरणमा परियोजनाले सहयोग गरेपछि ढाका कपडाको उत्पादनमा वृद्धि भएको  ढाका उद्यमी मनोज पौड्यालले जानकारी दिनुभयाे। उहाँले भन्नुभयाे, ‘बन्द अवस्थामा रहेका उद्योगमा अहिले धमाधम ढाका कपडा उत्पादन हुन थालेसँगै रोजगारीका अवसर सिर्जना भएको छ। ढाका कपडालाई ब्राण्डिङ गर्ने तयारी गरिएको छ। काठमाडौँमा ब्राण्डिङका लागि लोगो प्रदर्शन गरिएको छ।’

हस्तकलाको माध्यमबाट पछ्यौरा, टोपी, टाइ, कुर्ता, कोट तथा पर्दाका लागि ढाका कपडा उत्पादन हुन्छ। फुर्सुदका समयमा यहाँका महिला उद्योगमा  ढाका कपडा बुन्छन्। तानसेनकी लक्ष्मी थापाले ढाका कपडा बुनेर मासिक आठ हजारभन्दा बढी आम्दानी भएको बताउनुभयाे। ढाका उद्योगमा ढाका कपडा, तयारी पोशाक उत्पादनबाट पाल्पामा महिलाले रोजगारी पाएका छन्। यसले घर खर्च, परिवारको लालनपालनका केही खर्चको व्यवस्थापन गर्न सहज भएको हो। महिलाहरू सामान्य खर्चका लागि अरुको भर पर्ने दिनहरु ढाका कपडा बुन्न थालेपछि हटेको हो।

रम्भा गाउँपालिकाकी उषा सिंजालीले हस्तकलाको प्रयोग गरी ढाका कपडामा बुट्टा बनाउन खप्पिस भएका छन्। ढाका कपडा उत्पादनका क्रममा हात तथा खुट्टाको एकसाथ प्रयोग गर्नुपर्छ। तानमा पहिला धागो हाल्ने र डिजाइन गर्ने हो। हस्तकलाको प्रयोग गरी विभिन्न प्रकारका बुट्टाहरु भर्ने चलन छ। मसिनो काम भएकाले एक मिटर ढाका कपडा उत्पादन गर्न झण्डै तीन–चार दिन लाग्छ। यसरी ढाका कपडा बुनेर आम्दानी गर्न पाउँदा यहाँका महिला उत्साहित बनेका छन्।

 रासस

आजको ट्रेन्डिङ समाचार

धेरै कमेन्ट गरिएका