सेराबेँसीमा स्वास्थ्य सामाग्री सहयोग | Samacharpati सेराबेँसीमा स्वास्थ्य सामाग्री सहयोग – Samacharpati
Samacharpati
आइतवार, मंसिर १९, २०७८
आइतवार, मंसिर १९, २०७८
  • होमपेज
  • सेराबेँसीमा स्वास्थ्य सामाग्री सहयोग

सेराबेँसीमा स्वास्थ्य सामाग्री सहयोग

सेराबेँसीमा स्वास्थ्य सामाग्री सहयोग

पोखरा । शुक्लागण्डकी नगरपालिका वडा नं १ सेराबेँसीमा यही पुसदेखि सञ्चालनमा आएको विशेष स्वास्थ्य सेवा केन्द्रमा करिब ३० हजार रुपैयाँ बराबरको स्वास्थ्य सामाग्री सहयोग प्राप्त भएको छ । समाजसेवी लेखनाथ पन्थी तथा अनिल पन्थीले उपलब्ध गराउनुभएको स्वास्थ्य सामाग्री एक कार्यक्रमकाबीच आज महिला स्वास्थ्य स्वयं सेविका मधुमाया पन्थीले हस्तान्तरण गर्नुभयो ।

कार्यक्रममा प्रमुख अतिथि एवम् शुक्ला गण्डकी नगरपालिका वडा नं १ का वडा अध्यक्ष रविचन्द्र पौडेलले स्वास्थ्य सेवालाई सर्वसाधारणको सहज पहुँचका लागि सेराबेँसीमा विशेष स्वास्थ्य सेवा केन्द्र सञ्चालनमा ल्याइएको बताउनुभयो । केन्द्रबाट हाल हप्तामा दुई पटक सेवा प्रवाह भैरहेको बताउँदै उहाँले आगामी दिनमा यहाँबाट प्रदान गरिने स्वास्थ्य सेवालाई थप प्रभावकारी बनाउने विश्वास व्यक्त गर्नुभयो । केन्द्रबाट प्रत्येक हप्ताका सोमबार र बिहीबार एक जना अहेब तथा एक जना अनमीले स्वास्थ्य सेवा प्रदान गर्दै आउनुभएको छ ।

शिवशक्ति महिला समूहका अध्यक्ष अनिशा भुजेलको सभापतित्व एवम् नरेशचन्द्र भण्डारीको सञ्चालनमा भएको कार्यक्रममा वडा सदस्य सुशिला कमर, स्वास्थ्य चौकी इन्चार्ज रियाद अन्सारी, नेपाली काँग्रेसका नेता खेमराज अधिकारी लगायतले बोल्नुभएको थियो ।

आजको ट्रेन्डिङ समाचार