जुम्लाको जवा नदीबाट बिजुली उत्पादन • Nepal's Trusted Digital Newspaperजुम्लाको जवा नदीबाट बिजुली उत्पादन • Nepal's Trusted Digital Newspaper
  • होमपेज
  • जुम्लाको जवा नदीबाट बिजुली उत्पादन

जुम्लाको जवा नदीबाट बिजुली उत्पादन

  • मङ्लबार, मंसिर १०, २०७६
जुम्लाको जवा नदीबाट बिजुली उत्पादन

खलङ्गा, १० मङ्सिर । जुम्लाको पातारासी गाउँपालिका–४ लाम्रीगाउँमा बिजुली बल्न थालेको छ । स्थानीय जवा नदीमा साना जलविद्युत् आयोजना निर्माण भएपछि बिजुली बल्न थालेको हो । बिजुली र सिँचाइको व्यवस्था हुने गरी आयोजना निर्माण गरिएको छ । यसबाट ५८ किलोवाट विद्युत् उत्पादन भएको उपभोक्ता समितिका अध्यक्ष कृष्णबहादुर बुढाले बताउनुभयो  । “एउटै नहरबाट बिजुली पनि बलेको छ, सिँचाइ पनि हुन्छ”, अध्यक्ष बुढाले भन्नुभयो । आयोजना आर्थिक वर्ष २०७१÷७२ देखि निर्माण शुरु भएको थियो । साढे दुई वर्षमा सक्ने लक्ष्य राखिए पनि बजेट अभावले ढिलाइ भएको अध्यक्ष बुढाले बताउनुभयो ।

आयोजना कात्तिकमा निर्माण सम्पन्न भएको हो । आयोजनामा रु तीन करोड लाग्ने अनुमान गरिएको थियो । उपभोक्ता समितिले बजेट जुटाउनु परेकाले ढिलाइ भएको जनाएको छ । “उपभोक्ता समितिले बजेट जुटाउँदै काम गरेको छ”, अध्यक्ष बुढाले भन्नुभयो । तत्कालीन डिल्लीचौर गाउँ विकास समितिको कर्णाली रोजगार कार्यक्रमअन्तर्गत रु २० लाखमा काम शुरु गरिएको थियो । त्यसपछि सांसद विकास कोषको रु ३० लाख, सूर्य सामाजिक सेवा सङ्घको रु २० लाख र पातारासी गाउँपालिकाको रु ७५ लाख लागेको छ ।

सो आयोजनाबाट तिर्खु, लाम्री, डिल्लीचौर र जम्नगाउँमा बिजुली आपूर्ति हुनेछ । चारै गाउँका करीब ५०० परिवार लाभान्वित हुनेछन् । पाँच हजार रोपनीमा सिँचाइ विद्युत्सँगै आयोजनाबाट सिँचाइ पनि हुने भएको छ । यसबाट पाँच हजार रोपनीमा सिँचाइ हुने उपभोक्ता समितिले जनाएको छ । सिँचाइ पनि हुने भएकाले तरकारी खेती गर्न सजिलो भएको स्थानीयवासी वीरबहादुर बोहराले बताउनुभयो । “तरकारी उत्पादन गरेर स्थानीय बजारमा बिक्री गर्न सजिलो हुनेछ”, उहाँले भन्नुभयो । स्थानीय बासिन्दाले मार्सी धान रोप्ने गरे पनि सिँचाइको सुविधा नहुँदा रोग लाग्ने र लगानीअनुसार उत्पादन हुने गरेको थिएन । अब खेतीपाती गर्न सजिलो हुने स्थानीय बासिन्दाको विश्वास छ ।

आजको ट्रेन्डिङ समाचार

धेरै कमेन्ट गरिएका