धनगढी । अछाममा मलामी बोकेको ट्र्याक्टर दुर्घटना भएको छ। दुर्घटनामा एक जनाको मृत्यु भएको छ भने ३३ जना घाइते भएका छन्।

पञ्चदेवल विनायक नगरपालिकाको कालिकास्थाननजिक मलामी बोकेर घाटतिर जाँदै गरेको भे १ त ६७५६ नम्बरको ट्र्याक्टर दुर्घटना हुँदा एक जनाको घटनास्थलमै मृत्यु भएको हो। मृत्यु हुनेमा पञ्चदेवल विनायक नगरपालिका–६ का २४ वर्षीय दीर्घ विक रहेका छन्।

दुर्घटनामा परेर ३३ जना घाइते भएका छन्। घाइतेमध्ये चार जनाको अवस्थाको गम्भीर रहेको अछाम प्रहरीले जनाएको छ।

घाइते २४ जनाको जिल्ला अस्पतालमा उपचार भइरहेको छ भने ९ जनाको नजिकको स्वास्थ्य चौकीमा उपचार भइरहेको प्रहरीले जनाएको छ। घुम्ति मोडमा ट्र्याक्टर मोड्ने समयमा दुर्घटना भएको बुझिएको छ।

मलामी बोकेको ट्र्याक्टर दुर्घटना

प्रकाशित मिति: आइतवार, साउन ७, २०८०, ४:४८ बेलुका

लेखक: समाचारपाटी