रुकुम । जाजरकोटको भेरी नगरपालिकाका नवराज बिकलगायत ६ जनाको जघन्य हत्या सम्बन्धी मुद्दामा आज पनि रुकुम जिल्ला अदालतमा सुनुवाइ भइरहेको छ ।

रुकुम जिल्ला अदालत रुकुम पश्चिम का न्यायाधीश खड्कबहादुर केसीको इजलासमा हिजोदेखि सुरु भएको निरन्तर सुनुवाइमा आज पनि बहस भइरहेको हो ।

हिजो सरकारी वकिल तथा पीडित पक्षका ९ जना कानुन व्यवसायीले बहस गरेका थिए । आज पीडित वादी पक्षका कानुन व्यवसायीको बहस सकिएपछि प्रतिवादीतर्फको बहस हुनेछ ।

भोलिसम्ममा उक्त मुद्दाको अन्तिम सुनुवाइको बहस सकिने र केही दिनमा फैसला आउने अदालतले जनाएको छ।

२०७८ जेठ १० गते मल्ल थरकी आफ्नी प्रेमिकासँग विवाहका लागि साथीहरू लिएर रुकुम पश्चिमको चौरजहारी नगरपालिका–८ सोती पुगेका नवराजसहित ६ जनाको केटी पक्षबाट हत्या भएको थियो ।

केटी पक्षले दलितले मल्लसँग विवाह गर्न लागेको भन्दै केटीका परिवारसहित सोतीका स्थानीयले उनीहरूलाई लखेटेर हत्या गरेका थिए। मृतकहरूको शव भेरी नदीमा भेटिएको थियो । उक्त घटनामा १२ जना घाइते भएका थिए।

उक्त घटनामा प्रहरीले कर्तव्य ज्यान, ज्यान मार्ने उद्योग र जातीय छुवाछुतको कसुरमा सोती गाउँका ३४ जनालाई प्रतिवादी बनाएर रुकुम पश्चिम जिल्ला अदालतमा मुद्दा दर्ता गरेको थियो।

नवराज विकको हत्या

प्रकाशित मिति: सोमवार, मंसिर १८, २०८०, १२:५५ बेलुका

लेखक: समाचारपाटी